حبيبت من الفيس بوك ومش عارفه هو بيحبنى ولا لا وخايفة على سمعتي

• مشاكل عامة,مشاكل تقنية,مشاكل التعليم,مشاكل صحية,مشاكل زوجية,مشاكل الحب,مشاكل الشباب,مشاكل البنات 

 

 

 

مرحبا بكم فى مدونة مشاكل الحب والزواج - مدوونه للمشاكل العاطفية والزوجية والاجتماعيه ومشاكل الشباب والبنات

هنعرض مشكلة وبعض الحلول ليه وياريت تشاركونا برائيكم معانا

انا بنت واتعرفت على شاب فى الفيس بوك هومن نفس بلدى بس مكنش يعرفنى بعدما بعتلى طلب صداقه اتعرفت عليه بس كلامنا بيبقى دايما فى الحدود وانا حبيته ومش عارفه هو اه ولالا وفى نفس الوقت انا مبضفش اى رجاله او شباب فى صفحتى وانا بكلمو باسلوب كويس وانا متدينه جدا خايفه اسقط فى نظره او يستهتر بيا او تفكيره يروح لبعيدانى بجرى وراه او مرميه عليه انا كنت بحس من تصرفاته انو بيخاف عليا اوقات واوقات لا بعدسواعى ميعملش الحاجه اللى بضايقنى واوقات يعملها انا عاوزه اعرف هو بيحبنى ولالا وفى نفس الوقت عاوزه احافظ على سمعتى فكلامى معاه دابيبقى ايه ظروف

بعض الحلول المقترحه:

بسم الله الرحمن الرحيم.
السلام عليكم.
أولا كده عشا نكون واضحين ومنصفين
مينفعش نقول مفيش حب على الفيس أو النت
لأن في نفس الوقت ممكن نقول مفيش حب في أرض الواقع، لأن قصص كتير وعلاقات كتيرة جدا بتبدأ وتنتهي بخداع أحد الطرفين للآخر في كل مكان.
أما بالنسبة للحب في النت فهو نادر فعلا وأقل من الحب في الواقع، لكنه موجود، لأن الحب مش بيكون للشكل أو الجمال بقدر ما بيكون حب للشخصية والثقافة والفكر والأخلاق أكيد، فلو هو قدر يتعرف على أخلاقك وثقافتك عن طريق النت فممكن يكون فعلا بيفكر بشكل سليم ونيته خير.
ع العموم ندخل الموضوع بشكل دقيق أكتر.
نسبة متقلش عن 99% من الشباب بيتسلى على الفيس بوك بيتسلى بالبنات الساذجات اللي معندهمش خبرة ولا حكمة في فهم الآخرين، وتقريبا نفس النسبة من البنات معندهمش خبرة وخايبات ههههههههه.
كمان، الشاب المحترم اللي نيته خير، مش هيلعب ببنت عايز يتجوزها أو مُعجب بيها، فلمجرد إنه هيفتح معاها كلام هيبدأ يلمحلها على إنه عايز يرتبط بها بشكل رسمي، وهيكون سباق في طلب الارتباط الرسمي كمان، يعني مش هيقول لها خلينا سنة كده وبعدين آجي أخطبك، ولا هيقول قدامي شوية عشان أقدر أخطب، ولا هيقول أهلي مش هيوافقوا يخطبولي دلوقتي فنأجل الخطوبة دلوقتي، في الحالة دي يبقى اتفضل حضرتك اسكت ولما تنفع تخطب ابقى تعالى.
واضح إنك معجبة بيه جدا وبتتمني يكون شعوره زيك، بس طبعا صعب إنك تبادري بالكلام معاه، خاصة إنك ممكن تكوني مش عارفاه كويس.
أهم نقطة لازم تعرفيها هل هو بتاع بنات وصداقات وكلام من ده، ولا انتي الحالة الأولى أو الوحيدة له حاليا في حياته، ادخلي بوفايله وشوفي عنده بنات كتير ولا لأ، بس بردو غالبا الشاب بيقبل طلب صداقة أي بنت على الأقل عشان ميحرجهاش.
بس نقطة إنه بعتلك طلب صداقة في الأول مش مريحاني، لأنه بكده واضح إنك مش أول بنت يبعتلها طلب صداقة، وإن الفعل ده عادي جدا بالنسباله، فممكن يكون بيتسلى.
وكمان صعب إن شاب يخطب بنت بدون ما يشوفها، فغالبا ممكن يطلب منك تبعتيله صورتك أو تفتحي الكاميرا عشان يشوفك، ودي مصيبة وقع فيها بنات كتير زيك كده وكانوا بيثقوا في الشاب اللي بيطلب منها الطلب ده، وبتلاقي رد الفعل منه سيء جدا.
لنفترض إنه شخص سيء، ممكن يشتغل صورتك بإنه يركبها مثلا ببرامج التعديل على الصور على صورة غلط ويعمل حواليكي شوشرة، وحتى بدون تركيب، كفاية إن صورتك معاه ومفيش بينك وبينه حاجة رسمي، والمقابلات الخارجية بردو مش برجحها.
أنا عمال أتكلم عن الموضوع وكأنه بجد هههههههههه بس مفيش شاب هيبعت طلب صداقة لبنت إلا لسببين، إما بيتسلى أو عايز يخطبها، واللي بيتسلى بيعمل فيها محترم ومتدين وفجأة هتلاقيه اتغير، أما اللي ناوي خير، مش هيكذب ولا كذبة عليكي، هيطلب منك يقابل أهلك.
أنا رغيت كتير بكلام غير مرتب، لكن دي نصايح مهمة
- متبعتيش له صورتك أبدا أبدا لأنك مش ضامناه.
- متتكلميش معاه في الموبايل خالص ولا أي كلام بالصوت، ولا تديله نمرة تليفونك.
- لو قال كلام يخدش الحياء، اقفلي معاه علطول واحذفيه من عندك لأنه هيكون واحد بيتسلى.
- لو قال كلمة تُظهر حبه أو إعجابه زي مثلا كلمة (ربنا يخليكي ليا، أو ربنا ميحرمنيش منك) اسأليه سبب الكلمة دي ايه، ومتحسسيهوش إنك كارهاه عشان ميبعدش عنك O.o .
- لو طول عن شهر ومفيش جديد في كلامه قوليله مش هقدر أكلمك كده كتير عشان احنا مش ينفع نتكلم كده وأنا خايفة حد يعرف، وقتها بقى لو قال لك ماشي نقطع كلام يبقى كان بيتسلى، أما لو بيحبك فعلا هيتجنن ويقول لك طيب أنا عايز أتقدملك، لأنه هيخاف تروحي منه.
- قلتي إنك متدينة، يبقى غالبا هو متدين يا إما ملوش لزمة تعرفيه من الأساس، والمتدين تعرفيه من البوستات اللي بيشيرها (طبعا آراءه السياسية حاجة والبوستات حاجة) يعني مش معنى إنه ضد جماعة أو شيخ دين يبقى مش متدين، وبردو مش معنى إنه مؤيد لجماعة أو شيخ دين إنه متدين، التدين يعني أخلاق وعلم شرعي مش تأييد أعمى أو ببصيرة، أو معارضة عمياء أو ببصيرة.
- أنا بحكم خبرتي شايف إنه بنسبة 90% بيتسلى أو بيتعرف وخلاص ومش ناوي جواز، عشان كده حاولي تعرفي آخره ايه، حتى لو تقوليها صريحة له (آخرة كلامنا ده ايه؟)
ولو عايزك فعلا مش هيتكسف يقول لك، إذا كان متكسفش يبعتلك طلب صداقة وتلاقيه هو اللي بدأ بالكلام بردو معاكي، يبقى مش هيتكسف لما يلاقيكي هتروحي منه (إن كان بيحبك).
- الشاب المحترم المتدين الفاهم الخلوق، لو بنت هو معجب بيها وطلبت منه الجواز بنفسها حتى مش هتقل في نظره طالما عارف إنها عارفة إنه شخص ثقة وكويس، إنما لو طلبت منه وهي مش عارفاه يبقى هيشك فيها ومش هيثق فيها.
في نقطة نسيتها
هو بعتلك طلب الصداقة ليه؟
هل هو عارفك قبل كده؟
ولا لمجرد إنه شافك مثلا في الأشخاص اللي ممكن يكون عارفهم اللي الفيس بيقترحهم عليه وضافك؟
لو مكنش عارفك يبقى ضافك وخلاص من الأول بدون سبب
أما كلامك معاه فهو اللي يحدد مدى جديته في الموضوع
أتمنتالك الخير العاجل سواء بالبعد عنه أو القرب الرسمي منه، وربنا يكتبلك الخير في زوج المستقبل.

بعض الحلول المقترحه:

بصى ياأختى أحنا كلنا من الأخر فيسبوكية ولينا فيها من الأخر يعنى ههههههه……..
أذا تحدثنا عن تعاملك معاه فخليه فعلا زى ما أنتى ماشية فى الحدود والأخلاق والتربية
والتدين بتاعك وماتعمليهوش على أساس أنه انسان مرتبط بيكى أو أنسان أنتى بتحبيه بردوه
متعامليهوش على الأساس ده عامليه على أنه أخوكى أو صاحبك .لان هو فعلا حتى الأن فى تلك المرتبة…
فى نفس الوقت أذا حسيتى فى أى وقت أنه عمل حاجة غلط وضايقتك لا تلومينوه والسبب
1-بعض الشباب لهم أختبارات فانتى أذا لومتيه يبقا هو علم أنك
وقعتى فى حبه من غير ما
يقولك ويبدأ يلعب بيكى على راحته
2-احسنى اليه كما يحسن اليكى ولا تسيئى اليه اذا ااساء اليك لتبينى له الحالة الصحيحة أنك انسانة محترمة متدينة وليس بينكى وبينه شيئا لكى تلومينوه
وعلى فكرة بردوه ياريت ياربت ما تتسرعيش فى اختيار
شريك حياتك الا بعد ما تتأكدى ميه فى الميه ان الانسان ده بيخاف عليكى وممكن يعمل اى حاجة
عشانك ساعتها افتحيله قلبك ……….وفقكك الله وزادكى تدين

 بعض الحلول المقترحه:

يبقا مراهقه ومغامره برضو بسمعتك
انتي فاكرا ان الحب والتعارف والحكيات اللي بنسمعها علي النت دا حب ؟
افيقي ايتها الغاليه فالحب حب الزوج وغيره وهم
تقدري تقوليلي انتي حبتيه بناء علي ايه ؟؟
طبعن بناء علي طريقتو في الكلام الحلوه الرومنسيه
طيب ده يكفي انو يرتبط بيكي رسمي وتبقي مراتو ولا انتو وخدينها تسالي
والله انا بستغرب علي بنات اليوم وتقديراتهم السيئه في الحب بقا الحب عندهم هديه او كالام حلو او مجرد مظهر
وتجاهلو الجوهر والاخلاق والدين
هوا اكيد بيكلم غيرك كتير
وانتي لو لقيتي اسلوب احلي من كلامه من غير محلفلك هتعجبي بيه
يبقا انتي بتدحكي علي نفسك
اسئلي نفسك سوال لو بيحبني مثلااااااااااااا اخترها اييييييييييه هيتقدملك ولا هتقضوها فيييس بوك؟؟؟؟؟؟؟؟؟؟؟؟؟

 بعض الحلول المقترحه: 

السلام عليكم
اختى الكريمه حفظكى الله ورعاكى لنفسك ولاهلك ورزقكى بالزوج الصالح ان شاء الله
اولا اختى تصفحى واقرأ فى هذا الموقع عن مشاكل الحب على النت والفيس هتشوفى غرائب وعجائب
وكثير من هذه القصص ماتنتهى بالفشل والاكثر منها ينتهى بمصائب
اختى اعزكى الله انتى تقولى انك احبتيه ازى .. انت تعرفى ايه عنه غير البينات اللى على صفحته وبعض البينات اللى هو حكهالك بنفسه ومفيش حد هيتكلم عن نفسه بحجات مش كويسه
مع الاسف انت محبتهوش هو يمكن تكونى حبيتى كلامه حبيتى صوابعه لانها هى الاداه الوحيده التى توصل لكى كل شى عنه
حاولى تفكرى فى الموضوع بشكل منطقى شويه وخليكى فاكره ثقت اهلك فيكى وثقتك فى نفسك لو العلاقه دى لقدر الله متمتش شكلك قدام نفسك هيكون ايه وقدام اهلك وقدام الانسان اللى هترتبطى بيه بعد كده او قدام اولادك هتحافظى عليهم ازى من النت
حضرتك بتقولى انه من نفس بلدك لو نيته خير يجى يتقدم لو ظروفه متسمحش يجى يتكلم كلام بس على الاقل يسبت حسن نيته
ومتنسيش انك بتقولى انك متدينه …وربنا يوفقك ان شاء الله ويرشدك الى مافيه

ياريت تشاركونا برائيكم معانا

منشورة في: حب على النت